Leiðin okkar allra

 

Leiðin okkar allra.

 

 

Ég ætla mér út að Kalda
örlögin valda því.
Mörgum á ég greiða að gjalda
það er gömul saga og ný.

Guð einn veit
hvert leið mín liggur
líf mitt svo flókið er
oft ég er í hjarta hryggur
en ég harka samt af mér.

Eitt lítið knús, elsku mamma
áður en ég fer.
Nú er ég komin til að kveðja.
Ég kem aldrei aftur hér.

En mánaljósið fegrar fjöllin
ég feta veginn minn.
Dyrnar opnast draumahöllin
og dregur mig þar inn.

Ég þakkir sendi, sendi öllum
þetta er kveðjan mín.
Ég mun ganga á þessum vegi
uns lífsins dagur dvín.


Hjálmar( vonandi rétt eftir haft)

Móðir

 

ÞÚ ERT LÍKLEGA MÓÐIR

...ef þú felur þig inni á baðherbergi til að geta verið ein smástund.

...ef þú hefur verið í trimmgalla alla helgina.

...ef fæturnir á þér festast í klístrinu á eldhúsgólfinu

...og þér er alveg sama.
...ef það er líklegra að þú verðir fyrir eldingu en að þú fáir ótruflaðan 8 tíma svefn.

...ef þú hefur aðeins tíma til að raka annan fótlegginn í einu.

...ef þín skilgreining á góðum degi er að halda fötunum frá sulli og óhreinindum.

...ef þú þværð barninu í framan með munnvatnsbleyttum þumalfingrinum.

...ef þú gerir ósjálfrátt tvöfaldan hnút á allt sem þú hnýtir.

...ef þér finnst góð lyktin af soðnum gulrótum með eplamauki.

...ef þú ert farin að kaupa morgunkorn með sykurpúðum.

...ef þér tekst að setja ólíkar tegundir matvæla á disk, án þess að nokkrar þeirra snertist.

...ef þú vonar að tómatsósa sé grænmeti, af því að það er það eina sem barnið borðar.

...ef þú byrjar alltaf á að skera matinn þinn í litla bita og leyfir öðrum að borða af disknum þínum.

...ef þú segir setningar eins og:

"ekki setja pastað í nefið á þér...!""

...ef þú telur skrautsykursmolana á hverjum kökubita svo allir fái jafnt.

...ef þú velur veitingastaði eftir gæðum barnamatseðilsins og dótinu sem fylgir með.

...ef þú ferð á fætur kl 5:30 á hverjum degi, hefur ekki tíma til að borða (hvað þá að drekka eða fara á klósettið) og samt tekst þér að þyngjast um 5 kíló!

...ef símtölin þín eru sífellt slitin í sundur af setningum eins og:

"Ekki skrifa á vegginn!"

"Ekki nota köttinn fyrir fjall!"
"Nei, skrifborðið á ekki að vera í sófanum!"

"Hættu að toga í hárið á systur þinni"

"Bíddu aðeins á meðan ég næ í þráðlausa símann, ég þarf að skipta á barninu/gefa barninu að borða/ finna barnið!!"

...ef þú nærð að hlaupa í gegnum alla íbúðina (og um leið setja barnið í stólinn sinn, hoppa yfir tvö öryggishlið, velta þremur taukörfum, hrasa um leikfang, hundinn og bolta á ganginum) og svara símanum áður en kviknar á símsvaranum. Um leið hefur þú öðlast réttindi til þáttöku í fjölþraut og átt góða möguleika á að vinna gullið!

..ef þú hefur litlar áhyggjur af bauki og bramli, en fyllist skelfingu ef allt er hljótt.

...ef þú heyrir rödd móður þinnar þegar þú segir: "Nei, ekki þegar þú ert í sparifötunum!"

...ef þú ert hætt að gagnrýna uppeldi móður þinnar á þér og syskinum þínum.

...ef þú ert farin að raula Disney-lög yfir uppvaskinu.
...ef þú færð barnapíu til að komast loksins út með manninum þínum og eyðir svo hálfu kvöldinu í að athuga hvernig gengur heima.

...ef þú segir á hverjum degi: "Ég er ekki rétta manneskjan í þetta starf" en myndir samt ekki vilja skipta um hlutverk við nokkurn annan!

Konan

Konan sem kyndir ofninn minn

Ég finn það gegnum svefninn,
að einhver læðist inn
með eldhúslampann sinn,
og veit, að það er konan,
sem kyndir ofninn minn,
sem út með ösku fer
og eld að spónum ber
og yljar upp hjá mér,
læðist út úr stofunni
og lokar á eftir sér.

Ég veit að hún á sorgir,
en segir aldrei neitt,
þó sé hún dauða þreytt,
hendur hennar sótugar
og hárið illa greitt.
Hún fer að engu óð
er öllum mönnum góð
og vinnur verk sín hljóð -
Sumir skrifa í öskuna
öll sín bestu ljóð.

Ég veit að þessi kona
er vinafá og snauð
af veraldlegum auð,
að launin, sem hún fær,
eru last og daglegt brauð.
En oftast er það sá,
sem allir kvelja og smá,
sem mesta mildi á. -
Fáir njóta eldanna,
sem fyrstir kveikja þá.

       Davíð Stefánsson

Börnin

 

Foreldrar og börn.

Að verða foreldri breytir öllu í lífi þínu. Foreldrahlutverkið breytist líka með hverju barni. Hér eru nokkur dæmi um hver breytingin verður frá fyrsta til þriðja barns.

Föt
1.barn: Þú ferð í óléttufötin um leið og þú ert búin að pissa á pinnann og fá tvö strik.
2.barn: Þú ert í þínum venjulegu fötum eins lengi og þú mögulega getur.
3.barn: Óléttufötin eru þín venjulegu föt.

Undirbúningur fyrir fæðingu
1.barn: Þú gerir öndunaræfingar, mjög samviskusamlega.
2.barn: Þú nennir ekki að æfa, vegna þess að þú mannst að síðast gerðu öndunaræfingarnar ekkert gagn.
3.barn: Þú pantar mænudeyfingu strax á 8. Mánuði.

Barnafötin
1.barn: Þú þværð öll litlu sætu fötin, straujar og brýtur saman og raðar í kommóðuna.
2.barn: Þú rennir í gegnum fatabunkann, hendir því sem er mjög blettótt og þværð restina.
3.barn: Strákar geta alveg verið í bleiku, er það ekki ?

Áhyggjur
1.barn: Við fyrsta kjökur eða tíst sem heyrist úr vöggunni, rýkurðu til og tekur barnið upp.
2.barn: Þú tekur barnið upp, svo það veki ekki eldra barnið með vælinu.
3.barn: Þú kennir þriðja barninu að trekkja sjálft upp óróann yfir vöggunni.

Snuðið dettur í gólfið
1.barn: Þú tekur það upp og notar ekki aftur fyrr en þú ert búin að sjóða það rækilega.
2.barn: Þú skolar það undir næsta krana, eða bara með svolitlum ávaxtasafa úr glasi barnsins.
3.barn: Þú þurrkar það mesta af því í bolinn þinn og stingur því aftur upp í barnið.

Bleyjur
1.barn: Þú skiptir um bleyju á klukkutíma fresti, hvort sem þess er þörf eða ekki.
2.barn: Þú skiptir á 2-3 klst. fresti, ef þess þarf.
3.barn: Þú reynir að vera búin að skipta um bleyju, áður en aðrir fara að kvarta undan lyktinni, eða bleyjan dettur niður fyrir hné á barninu.

Afþreying
1.barn: Þú ferð með barnið í ungbarnasund, ungbarnanudd og barnaleikfimi.
2.barn: Þú ferð með barnið í ungbarnasund.
3.barn: Þú ferð með barnið í Kringluna og Smáralind.

Pössun
1.barn: Í fyrsta skipti sem þú ferð út, þá hringirðu heim, 5 sinnum.
2.barn: Þú rétt mannst eftir að skilja eftir númer, sem hægt er að ná í þig.
3.barn: Þú segir barnfóstrunni að hringja bara ef það sést blóð.

Heima
1.barn: Þú eyðir góðum hluta dagsins í að stara á barnið.
2.barn: Þú eyðir góðum hluta dagsins í að stara á eldra barnið svo það klípi ekki eða poti í augun á nýja barninu.
3.barn: Þú eyðir góðum hluta dagsins í að fela þig fyrir börnunum.

Tekið saman af þriðja barni sem spyr enn: "Hvar eru barnamyndirnar af mér eiginlega ?

Mannrækt

 

 

Hvað er langt síðan þú:

Skiptir um skoðun í mikilvægu máli?

Prófaðir nýja tómstundariðju?

Fórst á námskeið á nýju sviði?

Tókst þátt í íþrótt eða leik?

Notaðir stundarfjórðung, eða meira, í að sinna líkama þínum, tilfinningum eða skynjun?

Kynntir þér nýtt tungumál eða menningu?

Hlustaðir í stundarfjórðung, eða lengur, á skoðanir sem þú varst ósammála um, trúarbrögð, stjórnmál, einkamál eða atvinnumál?

Bragðaðir nýjan rétt, fannst nýjan ilm, hlustaðir á nýtt hljóð?

Lést eftir þér að gráta eða segja “mér þykir vænt um þig” eða reka upp öskur eða viðurkenna að þú værir hrædd(ur)?

Horfðir á sólina (tunglið) setjast eða fugl svífa á vængjum eða blóm springa út í sólskini?

Ferðast til staðar sem þú hafðir ekki komið á áður?

Eignast nýjan vin eða leggja rækt við gamla vináttu?

Fórst í ¨hugarferð¨(sjónsköpun) - gafst ímyndunaraflinu lausan tauminn í tíu mín. eða lengur?

Gerðir eitthvað sem þig langaði til í það skiptið án þess að hugsa um afleiðingarnar?

Dokaðir við til að “hlusta”á hvað var að gerast innra með þér?

Lést ósjálfrátt í ljós tilfinningu- reiði, fögnuð, ótta, dapurleika, væntumþykju – án þess að hugsa um það?

Gerðir það sem þig langaði til í stað þess sem þér fannst þér “bera”að gera?

Lést eftir þér að eyða tíma eða peningum í stað þess að spara til morgundagsins?

Keyptir upp úr þurru eitthvað sem þig langaði í?

Gerðir eitthvað sem enginn (ekki einu sinni þú) áttir von á?

Robert E. Alberti

Allt sem ég gæti verið ......

Ég vildi að ég væri

Ljóð: Davíð Stefánsson

ég vildi, að ég væri
vín á þinni skál,
gneisti á þínum glæðum,
garn á þinni nál,
skeið þín eða skæri,
skipið sem þig ber,
gras við götu þína,
gull á fingri þér,
bók á borði þínu,
band á þínum kjól,
sæng þín eða svæfill,
sessa á þínum skól,
ár af ævi þinni,
eitt þitt leyndarmál,
blóm á brjósti þínu,
bæn á þinni sál.

Ég vildi að ég væri.................

 

Bleikt tungl... eftir Steinar Steinunnarson.

Ég er norður, ég er austur

Ég er veikur, ég er hraustur

Ég er sandur, ég er mold

Ég er andi, ég er hold.

Ég er kona, ég er maður

Ég er rökvís, ég er blaður

Ég er sæll, ég er sár

Ég er bros, ég er tár.

Ég er stríð, ég er friður

Ég er upp, ég er niður

Ég er lag, ég er ljóð

Ég er piltur, ég er fljóð.

Ég er Grettir, ég er Glámur

Ég er skrækur, ég er rámur

Ég er tröll, ég er álfur

Ég er heill, ég er hálfur.

Ég er suður, ég er vestur

Ég er boðflenna, ég er gestur

Ég er faðir, ég er móðir

Ég er systir, ég er bróðir.

Ég er grugg, ég er tær

Ég er stormur, ég er blær

Ég er sorg, ég er hlátur

Ég er gleði, ég er grátur.

Ég er fávís, ég er fróður

Ég er eyðing, ég er gróður

Ég er rýr, ég er feitur

Ég er kaldur, ég er heitur.

Ég er nískur, ég er gjöfull

Ég er engill, ég er djöfull

Ég er máni, ég er sunna

Ég er munkur, ég er nunna.

Ekki dugleg

við að reyna við þetta kerfi og þreifa mig áfram.

 

En smá speki:

Þetta gerðist allt af sjálfum sér án þess að við væntum þess eða gerðum um það áætlanir, og þess vegna trúðum við á það.

 

 

Stjörnuspá

Ofboðslega þykja mér stjörnuspár frábærar og birti hér spá vatnsberans fyrir daginn í dag:

 “Litlar lexíur hafa áhrif á persónuleika þinn. Þú ert ennþá þú, bara vitrari og ákveðnari. Í kvöld er fullkominn tími til að hitta fólkið sem þú hefur heyrt svo mikið um.” 

Núna get ég velt fyrir mér ýmsu: 

Lexía er væntanlega eitthvað sem tengist orðræðu og ég á að læra af, litlar tákna líklega ekki mörg orð og afar spennandi að hlusta eftir í deginum hvað hefur áhrif á persónuleika minn. 

“Þú ert ennþá þú, bara vitrari og ákveðnari”  

 Ég er glöð með að fá áfram að vera ég – það er nógu flókið – hvað þá einhver annar.  Vitur og ákveðin snjallt. 

Kvöldið er frátekið fyrir manninn sem ég elska, vona að enginn skipti sér af okkur, fjölskylda og vinir eru það fólk sem ég elska að heyra mikið um og í. 

Njótum dagsins, lífsins og hvers annars.

Íhugun

 

“til er aðeins eitt gott, þekking, og eitt illt, fáfræði„

Þegar ég rekst á svona gullkorn verð ég örlítið klumsa. Enn einu sinni velti ég fyrir mér: við hvað er miðað og hvernig er mælt?

Njótum dagsins, lífsins og hvers annars.